Lampíricos é a nova proposta de Antón Lopo, un proxecto no que os espazos e as personaxes se superpoñen a partir duns textos escritos na cidade atlántica de Essaouira, referente do sufismo marroquí. Os textos indagan nunha contemporaneidade quebrada, cun corpus social reventado e unha aturdida parálise individual. Lampíricos preséntase como unha paisaxe de impulsos e sentimentos que atrapa á espectadora-lectora nunha acción implacable.

Elvira Riveiro e a dj Carina Posse estrean o venres 21 de xuño, ás 20:30 h., o espectáculo Balada do Peep Show, unha combinación de poesía, performance, música e vídeo. Será en Vigo, máis en concreto no Bou Eva (rúa Terzo de Fóra, 11). O espectáculo irá seguido, ás 22 h., por unha sesión nu jazz, deephouse e downbeat a cargo da dj.

O martes 18 de xuño ás 21 h., no Modus Vivendi de Compostela, pechará o curso dos Picaversos que organizan Branca Novoneyra e Olalla Cociña. Será cun recital de textos de Jack Kerouac na interpretación da actriz e xornalista Comba Campoy e do músico Bernardo Martínez.