Despois de Cidades (1997) e Poetízate (2006), Fran Alonso volve ofrecernos un poemario para os máis novos con este O meu gato é poeta (2011). A presentación editorial fala do seu artellamento a modo de obradoiro no que teñen cabida desde a mestura de xéneros á aposta polo interartístico e polas novas tecnoloxías. Esa vertente de apertura da poesía e do novo lectorado aos recursos que a tecnoloxía pode ofrecer vén dada desde o cedé que acompaña o libro, con seis cancións con música de Xurxo Souto, e desde a web propia www.gatopoeta.net.

Tamén Antonio García Teijeiro vén de publicar un poemario para nenas e nenos, Recendos de aire sonoro (2011), no que fai converxer, na liña das súas inquedanzas habituais, o mellor da poesía e da música. As ilustracións son de Fino Lorenzo.