Tinta de Lura é a iniciativa de tres persoas que fan converxer as súas vivencias e a súa formación na posta en marcha dun proxecto cultural que pretende visibilizar a poesía e a cultura galegas dun xeito diferente. A presentación oficial chegará no mes de maio, previo paso por Achegarte na Coruña a pasada fin de semana (2 e 3 de abril), e o produto que comercializarán en primeiro lugar serán camisetas con versos de poetas galegos. Alén dos máis coñecidos como Manuel Antonio e Rosalía incluirán outros e outras de menos sona entre a xente.

As camisetas serán só o primeiro paso, ao que seguirán outro tipo de iniciativas como incorporar música aos seus deseños e crear un portal web desde o que remitir os compradores e compradoras dos seus produtos aos libros e aos discos que hai detrás deles.