Nas páxinas do último Protexta Antonio Gamoneda, Premio Cervantes e Nacional de Poesía, manifesta o seu aprecio pola literatura galega nunha conversa con María do Cebreiro: "Se sacásemos a media cualitativa da literatura de Galicia e a doutras rexións de España, ou do resto de España na súa totalidade, sería máis alta en Galicia. E isto ten que ver coa vontade de vivificar a lingua".

A poeta e xornalista Ana Romaní, responsábel do Diario Cultural da Radio Galega, reflexiona sobre a súa escrita e as súas influencias, racha coas etiquetas coas que foi catalogada, e aborda tamén o seu labor xornalístico e o seu compromiso feminista.

Antón Figueroa, que aplicou ao caso galego a teoría dos campos literarios de Pierre Bourdieu, conversa ao redor do seu último estudo, Ideoloxía e autonomía no campo literario galego (Laiovento, 2010), que afonda nos mecanismos de poder ao redor da escrita.