"O traballo creativo a miúdo precisa dun espazo e tempo propios, e dunha forma de atención non doada de atopar no mundo social actual, onde o imperativo externo do sistema produtivo aprisiona a posibilidade de expansión e desenvolvemento creativo. Non é doado, a día de hoxe, atopar espazos que propicien a realización libre dese proceso. @s integrantes da Axóuxere entenden a vida como un proceso creador, que -contra as paramétricas actuais da sociedade capitalista- se realiza no coñecemento, na autoexpresión e no despregue do ser de cada un. É esa unha das razóns polas que a editora configurou un espazo dende o que traballa, e no que plantexa unha forma de vida comunitaria, baseada no mutuo respecto e na investigación co-relacional entre persoas, a fin de formar unha potencia emancipadora que nos libere do xugo das opinións e das crenzas cotiás, abríndose o paso cara a horizontes experienciais non determinados como dogma de ningún tipo."