Protexta 19 ábrese cun achegamento ao Proxecto Derriba (www.proxectoderriba.org) desde o seu nacemento ata as actividades que organizan; entre as máis recentes figuran un obradoiro no Museo Verbum de Vigo e a súa colaboración con Estaleiro Editora que deu lugar xa á edición de catro monografías de diferentes pensadores (Negri, Vattimo, Derrida e Jameson) ás que seguirán outras dúas sobre Ulrich Beck e Terry Eagleton.

No apartado de entrevistas, Fran Alonso declara que por unha banda lle alegraría que houbese best-sellers na literatura galega, porque iso sería un síntoma dunha literatura normalizada, se ben expresa tamén as súas dúbidas con respecto á calidade e á improbabilidade de logralo todo, normalización e calidade. A entrevista a Arturo Casas, noutra orde de cousas, excúsase (en palabras da entrevistadora) na publicación de Alusión, pero salta desde o blog que foi a orixe dese libro (Efémeras Lándoas) ás redes sociais, ao pracer da escrita, ao humor e ao discurso político nos seus post.

Atópanse aínda recensións sobre as publicacións máis recentes nos diferentes xéneros, formatos e eidos da escrita (ensaio, banda deseñada, LIX, poesía, teatro, tradución), que dan pé a reflexións profundas sobre todo tipo de cuestións, como por exemplo as que falan de globalización como imperialismo ou da teorización sobre a indignación.