O PP de Galicia propuxo declarar o 2012 como ano de Celso Emilio Ferreiro co gallo do centenario do seu nacemento, e a súa proposta foi aprobada por unanimidade parlamentaria. Destacan o seu labor como renovador da literatura galega e a súa actividade política e literaria de compromiso con Galicia e defensa das liberdades democráticas.

A Xunta de Galicia elaborará, preferentemente antes do 4 de xaneiro de 2012, un plan de actuación que incluirá a promoción e difusión da súa figura e da súa obra e procurará a implicación de institucións públicas e culturais (especialmente a Fundación Celso Emilio).

No plano editorial, Ramón Nicolás prepara unha biografía que será publicada por Xerais, e reivindica que hai moitas áreas pouco estudadas da obra do autor de Longa noite de pedra e Viaxe ao país dos ananos, particularmente no tocante á prosa e á súa obra xornalística.