A celebración dun 17 de maio dedicado ao poeta de Monforte supuxo unha explosión festiva pero tamén documental e crítica arredor da súa figura humana, das súas relacións de amizade, dos proxectos que compartiu e por suposto da súa obra, vista esta de xeito renovado á luz dos seus gustos musicais, pictóricos, cinematográficos, literarios...

A segunda edición do dossier estaba prevista polo equipo do proxecto desde a aparición da primeira, en abril deste mesmo ano. Loxicamente, era imposíbel presentar unha especie de summa que recadase a totalidade dos materiais críticos que agromaron nestes meses por todo o país. Impídeo entre outros motivos o obrigado respecto aos dereitos de autoría e edición. Con todo, mercé á xenerosidade de medios e produtores culturais, conseguíuse plasmar un reforzo importante do compendio orixinal, o cal seguramente xustifique a prórroga compilatoria e en definitiva a reaparición do dossier, dispoñíbel en breve para descarga aquí, no repositorio poesiagalega.org.