Recensión de Construcións, de Eduardo Estévez, que comeza cunha alusión á polémica na que se viu envolto o libro tras serlle retirado o premio Miguel González Garcés. Tal circunstancia relaciónase con outros aspectos deliberadamente polémicos do libro, como a ausencia de ornato poético, a tendencia á narratividade ou a fuxida dos recursos poéticos típicos. Fronte a isto, o autor da recensión fai unha defensa da condición poética dunha obra que, na súa opinión, busca a poesía na vida cotiá. Alén disto, cualifica o libro de ousado, vangardista e mininimalista, ao tempo que salienta o reto de "construír unha historia baixo a forma poética máis simple imaxinábel".