A recensión ábrese sinalando os aspectos da praxe poética de Chus Pato que reaparecen en m-Talá, nomeadamente o social, o culturalismo, o feminismo e a reflexión metapoética. Sintetízanse tamén as numerosas referencias culturalistas que aparecen no poemario así coma os diferentes materiais discursivos que se manexan. A recensión amosa como en m-Talá reaparecen algunhas das preocupacións constantes da poesía de Chus Pato: a opresión, a ausencia de debate crítico e os límites da literatura como ferramenta de comunicación e coñecemento. Finalmente, lémbrasenos que varios poemas apareceran previamente en Internet e cuestiónase mesmo a consideración do libro como poemario.