Nas intuicións de Rosalía de Castro, López Nogueira ve dous elementos destacables existencialmente: o sentimento existencial da morte e o sentimento de fatalidade, enlazado con certo sentimento de culpa. A "sombra" é unha Morte absoluta, con toda a súa facultade de ocultamento. Revela un complexo vivencial típico das enfermas con tendencia depresiva. Houbo motivos suficientes na vida da autora que colmaron un trasfondo depresivo endóxeno. Pero o poema non é pesimista e anguriado, senón melancólico e resignado. López Nogueira opina que Rosalía de Castro captou con acerto a vivencia saudosa, gran achega metafísica da poesía galega á literatura universal.