Carlos Fontes (Vilaboa, Pontevedra, 1968), que xa se dera a coñecer en escolmas poéticas, estréase como autor de libro con este título publicado en Espiral Maior. Vicente Araguas reflexiona sobre o tino na escolla de título para asegurar un certo número extra de vendas dun libro, e trae a colación outros casos de paratextos rechamantes de Elena Medel e Luis Muñoz. Detrás do título opina que hai menos orixinalidade: un libro de poesía que o crítico etiqueta de "belixerante ou de tendencia", é dicir, poesía política, que este autor alterna coa poesía erótica. Afirma que o poeta se move nunha liña xa coñecida abondo, e semellante á de Ángel González, Mario Benedetti ou Eduardo Galeano. É dicir, nunha poesía xusticeira, ecoloxista, benhumorada e politicamente correcta.