A fotografía é un dos rexistros da acción poética Dentro, que Antón Lopo desenvolveu no lameiro de Portocarreiro, na Ulloa, entre xuño de 2003 e febreiro de 2006. O poeta acompañou a dezaseis persoas neste tempo a aquel lugar. "No lameiro non hai o alento épico do infinito", é un sitio espido e vulgar, anota o autor no limiar ao libro Dentro (2006). En Portocarreiro, Lopo fixo a mesma pregunta a cada un/ha dos dezaseis acompañantes. De aí debía xurdir un poema (véxase abaixo o texto asociado ao que Chus Pato fixo e respondeu) e tamén o conxunto das fotografías expostas en 2006 na Casa da Parra.

O que faría sería tombarme,
encaixar
             o meu espiñazo na curvatura do planeta
até formar
               unha elipse que me conducise á nada

                                        e ao seu pracer xeomético.
É a forma máis perfecta que coñezo de volver
á compaña absoluta:
                                 o embrión e a placenta.

Porque a morte sucede antes,
                                              no ventre,
                                                            na nai.