Necrolóxica no xornal El País na que se sitúa como foco para falar de Lois Pereiro a fonda amizade de Manuel Rivas co poeta do Incio. O que se presenta é unha semblanza en primeiro plano, validada en relación coa personalidade do poeta polo contacto directo e o trato cotián desde os anos de formación compartidos en Madrid. Destacan as notas sobre a cambiante relación de Pereiro coa escritura en distintos momentos da súa vida, até a consideración experimentada nos tempos máis duros da enfermidade, cando escribir se converteu nun xeito de lle arrapañar algo á morte. Fálase no artigo así mesmo do valor que o círculo de amigos de Lois Pereiro outorgaban á súa orientación estética e poética. Observa Rivas que a facilidade de Pereiro para as linguas e a súa capacidade para explorar novos escenarios artísticos, cinematográficos, literarios e musicais supuxeron adoito para quen o tratou unha guía certa e fiábel sobre os sitios ou fontes aos que pagaba a pena acudir.