Presentación e edición do guión inédito correspondente á emisión radiofónica que Xosé Díaz Jácome dedicou a Celso Emilio Ferreiro no programa Mensaje Poético, por el dirixido en Radio Vigo, o 16 de maio de 1955 co título "Celso Emilio Ferreiro y su plena voz bilingüe". O texto de Díaz Jácome fai referencia fundamentalmente á publicación, en 1954, do libro de Celso Emilio O soño sulagado. Desenvólvese así mesmo unha introdución á produción literaria anterior e á súa poética, sen perder de vista a personalidade do autor, na altura residente en Vigo. Sucesivamente dáse paso ao recitado dunha serie de poemas, glosados ou comentados polo locutor seguindo as notas de Díaz Jácome e con interpolacións musicais sobre cuxo carácter aparecen algunhas recomendacións a cargo do director do programa.

O equipo de poesiagalega.org agradece a Armando Requeixo as facilidades para a reprodución do traballo.