Juan Paredes Núñez pretende situar a Rosalía de Castro no seu tempo e no seu lugar a través da visión dos seus contemporáneos, concretamente de Emilia Pardo Bazán. Con este fin analiza o discurso pronunciado por Pardo Bazán en homenaxe a Rosalía. Se ben a primeira coloca á segunda no centro da poesía rexional galega e destaca o valor de Cantares gallegos, non ocorre o mesmo co libro Follas novas.

Despois de referirse ao desencontro da condesa con Manuel Murguía, o autor considera que aquela non entendía a Rosalía. Como conclusión afirma que cómpre ver a Rosalía na súa totalidade para non desvirtuar o seu verdadeiro papel e a súa personalidade.