Entrevista realizada con motivo da publicación en Faktoria K de Libros no ano 2009 da Escolma poética de Ramón Cabanillas, ao coidado de Luís Rei e con ilustracións de Anxo Pastor. Lupe Gómez pregunta ao artista gráfico e poeta polas súas relacións con Novoneyra e con outros escritores e pensadores. Coméntanse tamén os recordos de infancia en Vilardonas e algunhas vivencias do Courel e de Vilagarcía de Arousa, onde Pastor rexenta unha galería de arte, Arcana, na que se teñen realizado exposicións de poesía visual e presentación de libros, alén doutras mostras propiamente gráficas e plásticas. O ilustrador expón o que para el supuxo debuxar para acompañar os textos de Cabanillas e fai o propio respecto doutros títulos que tamén ilustrou, como o libro de poemas Dentro do labirinto, de Branca Novoneyra. Fálase así mesmo da actividade como escritor de Anxo Pastor e reflexiónase sobre se o ilustrador de libros de poesía se converte, por selo, nun poeta visual.