Nota introdutoria de José-Martinho Montero Santalha a dous poemas inéditos de Xosé María Álvarez Blázquez, "Foje!" e "A final...", escritos con grafía portuguesa.  O poema "Foje!", de 1932, leva o subtítulo "portugués" e forma parte dunha serie de exercicios en diferentes linguas, como o francés e o italiano. Así pois, cabe deducir que neste momento o autor considera o portugués como unha lingua estranxeira. Porén, nos paratextos do poema "A final...", escrito dous anos máis tarde, non aparece referencia algunha á lingua. Isto, sumado ao feito de o texto atoparse inserido nun conxunto de poemas en galego, leva a Montero Santalha a formular a hipótese de que Álvarez Blázquez contemplou a grafía portuguesa como unha posibilidade para a lingua galega.