Análise da poética de Uxío Novoneyra a partir do seu poema "O Laxeiro pintor dunha Galicia" (1971), retitulado nunha publicación posterior "Galicia teima vida / Poema mundo Laxeiro". Estúdase o texto como écfrase da produción pictórica global de Laxeiro e saliéntase o paradoxal da súa formulación, asociábel a un intento de posta en diálogo de dúas estéticas moi diferenciadas. Sostense que o poema non é un texto ancilar nin tampouco suplementario do metatexto pictórico Laxeiro. Tamén que non existe unha transtextualidade típica. O que existiría é unha correlación no referente a un substrato antropolóxico e estético, a unha visión do mundo que se corresponde coa forma de estar e ser da Galicia rural.