AZUL

Recuperar o azul
e habitar a cacofonía da chuvia nas Alpujarras.
Que lonxe! Inverness, Granada e o silencio,
esta idade descoñecida do veciño silencio,
ese curmán que non esquece que foi o primeiro
en bicar os nosos labios nun verán
que xa é un carolo no océano.
Recuperar o azul
cando o tiña todo
o blues e a vida
e ollaba o mundo con acenos estraños e inxenuos
e tecía os días con fíos indios.
Que o azul fenda a memoria
co estrondo da chuvia nas Alpujarras,
que ceibe as bicicletas cheas de ferruxe
e abra a fiestra ao sol duro,
que bata na balorenta superficie dos cadros
onde crías amar o meu corpo e a voz de Bessie Smith.