Recensión da cuarta edición da revista Ronsel, pois á orixinal de 1924 hai que engadir o "Número conmemorativo del cincuentenario de su publicación. 1924-1974", datado en Lugo o 15 de xaneiro de 1975, e a reimpresión realizada en 1982 por Sotelo Blanco. Ronsel. Revista de Arte, dirixida por Evaristo Correa Calderón, con Álvaro Cebreiro de director artístico e Álvaro Gil de secretario de redacción, editou en Lugo seis números entre maio e novembro de 1924. Estaba vinculada ao galeguismo político e nela aparecen textos emblemáticos da nosa literatura, pero tamén doutros discursos literarios europeos, sobre todo do portugués, até o punto de que se adoita cualificar como unha revista de vangarda, denominación que aquí se cuestiona para unha publicación que no primeiro número se definía como "revista ecléctica", e que axiña mudaría o subtítulo de Revista de Arte polo máis acaído de Revista de la nueva generación gallega.