Comentario da teoría sobre a influencia rosaliana na poesía de Luz Pozo Garza, que esta poeta defendeu no seu discurso de ingreso na Real Academia Galega, titulado significativamente Diálogos con Rosalía. O achegamento a ese traballo faise a partir do contraste das teorías de Luz Pozo e as de Harold Bloom a propósito das influencias, que fronte á visión patriarcal e de loita entre pais e fillos do estadounidense, se perfila na poeta como unha conversa entre nais e fillas dentro da xenealoxía feminina da literatura galega que ten como mascarón de proa a Rosalía de Castro. A partir do "Poema en cinco lembranzas pra Rosalía", Silvia Bermúdez dá forma a unha lectura da que sae reafirmada a idea de que Rosalía é a interrogante por excelencia na literatura galega, razón pola cal as poetas galegas contemporáneas seguen a falar de/con ela.