Estudo preliminar de Xesús Alonso Montero á Antoloxía consultada comezada por Xosé Fernando Filgueira Valverde en 1935 e inédita dende entón. En primeiro lugar, Alonso Montero analiza a figura do antólogo e as súas achegas como profesor de literatura, investigador literario, medievalista, conferenciante e polígrafo. A continuación, o estudoso aborda a xénese e o contido da antoloxía da poesía galega encargada polo Seminario de Estudos Galegos a Filgueira Valverde (o título, a bibliografía, o "inquérito";, as respostas dos poetas, o código lingüístico) e compáraa coa segunda antoloxía consultada (a de Francisco Fernández del Riego). Finalmente, no apéndice, Alonso Montero redacta un dicionario dos 32 autores que figuran na Antoloxía consultada da poesía galega entre 1935 e 1936 e expón os criterios de edición.