Reseña de Fóra do sagrado en que se reconstrúen as constelacións poéticas das que participa o libro. Alúdese á posición da obra na traxectoria do autor e o seu compromiso co colectivo Redes Escarlata. Refírese tamén a intertextualidade estabelecida con autores como Meendinho e Oriana Méndez, ou os vínculos discursivos con poemarios como Charenton (de Chus Pato) ou Éxodo (de Daniel Salgado). A poética resultante defínese a partir da forza acadada pola acumulación de antropónimos e topónimos, a reescrita da cidade de Vigo e da súa memoria comunal en termos emancipadores, así como a conexión da proposta coa literatura popular e a oralidade.