Reseña de Bingo en que se explicita a capacidade metapoética, autorreflexiva e de intervención social ensaiada por Pilar Beiro. A autora sinala a proxección desas constantes cara á construción dunha poética feminista en que comparece tamén a distancia irónica e o humor. Son referidos os seus vínculos con determinadas liñas dos programas poéticos do colectivo Redes Escarlata, Chus Pato ou Xabier Cordal, así como a reescrita consciente doutros referentes como Adorno, Rimbaud, Celan ou Akhmátova. Ana Salgado informa da estrutura da obra e detense con maior demora na segunda parte, titulada "A primeira vez (documental)", descrita como unha reflexión sobre a identidade sexual, a esquerda, o desposuimento da cultura ou a privatización do desexo.